ROXAS CITY – Padayon nga ginabulong sa magkatuhay nga ospital ang mag-bayaw nga lalaki, matapos nga naglab-anay sa Barangay Caidquid, Mambusao, Capiz.
Ginkilala ang mga persona sanday Rey Castañeda Octavio, 37-anyos kag Julie Nasola Dalida, sa legal nga pang-edaron kag lunsay residente sang nasambit nga barangay.
Sandig sa inisyal nga imbestigasyon sang mga katapo sang Mambusao MPS, nga samtang nagapauli ang mga ini nagikan sa balay sang ila tiyo nga si Serio Dalida, nag-angkon sang indi pag-intindihanay ang duha kag nagbalusay sang labo.
Bangud diri, nautod ang nawala nga kamot ni Octavio nga gilayon ginpadangat sa Mambusao District Hospital, samtang pilas sa magkatuhay nga parte sang lawas ang naangkon ni Dalida nga gindala sa Dao District Hospital.
Nahibaluan nga lunsay yara sa impluwensiya sang makahulubog nga ilimnon ang magbayaw.
