ROXAS CITY – Nangibabaw ang gahum sang pangamuyo, pag-manifest kag pagsalig sa kaugalingon agud maka-pasar ang 4 ka mag-abyan sa Mechanical Engineers Licensure Examination nga ginhiwat sang Pebrero 20-22, 2024.
Ini amu sanday Engr. Jaennel Derofino, Engr. Alvin Lo-oc, Engr. Ian Niel Morales kag Engr. April Joy Dumagpi lunsay mga produkto sang Capiz State University – Main Campus.
Aminado ang mag-classmates nga nabudlayan sa panahon sang filing bangud indi kumpleto ang ila mga requirements kasubong sang grades kag diploma apang bangud sa ila determinasyon kag pagpanikasog, natigayon ang mga ini nga naka-pasa sa ulihe nga adlaw sang filing of applications sa Professional Regulation Commission (PRC) sa Cebu City.
Suno kay Engr. Derofino, nagpadulong sila nga mag-abyan sa Cebu City bitbit ang paglaum nga malab-ot ang ila handum nga mangin isa ka enhinyero kag mangin bugal sang ila tagsa ka pamilya.
Naka-set naman ang paino-ino ni Engr. Lo-oc nga sa iya pagbiya sa lugar, wala na sang pagpangduha-duha kag lugar ang failure bangud magapauli ini sa probinsya dala ang kadungganan nga isa na ini ka engineer.
Nangin inspirasyon naman ni Engr. Morales ang iya pakaisa nga isa man ka engineer, agud talikdan ang childhood dream nga mangin chef kag sudlon ang kalibutan sang isa ka mechanical engineer.
Samtang, wala nagsulod sa panumduman ni Engr. Dumagpi nga magsurrender sa iya pag-eskwela apisar sa mga ginapangatubang nga kabudlay bangud luyag sini panindugan ang iya ginpili nga kurso kag makit-an kun tubtob sa diin ini sarang dal-on sang iya pagtimakas.
Nag-atubang ang apat sa daku nga pagpanghangkat ilabi na indi kinaandan ang lugar kag iba ang lenggwahe nga ila ginagamit apang indi ini nangin upang agud ma-angkon nila ang ila handum.
Suno kay Derofino, Dumagpi, kag Morales, apisar kampante sa ila gintun-an, suksok sang tatlo ang makabig ‘secret weapon’ sang mga nagakuha sang pasinawan – amu ang red underwear kag lapis nga gintasa sang mga nanliligad nga topnotchers.
Samtang, determinasyon nga mangin isa ka ‘good provider’ sa iya pamilya kag ‘role model’ sa iya mga utod ang nangin pambato ni Lo-oc agud malumpawasan kag mapasar ang nasambit nga pasinawan.
Mahibaluan ginpaguwa sang PRC ang resulta tatlo ka adlaw matapos ang exam sa diin sa 6,770 ang nagkuha, 4,458 diri ang nakapasar kag 14 tanan ang nagikan sa CAPSU – Main.
