Patay ang mag-iloy sa pagpangluthang sa Barangay Sagrada Familia, Dumarao,Capiz.
Ang biktima amo si alyas Rose, 52-anyos, isa ka iloy kag ang anak sini amo si alyas mark, 25-anyos.
Ang ginatudlo person of interest sa pagpatay sa mag-iloy amo si alyas Romel, utod ni alyas Rose.
Sa interview sang Bombo Radyo kay Police Lieutenant Russel Husmalaga, Public Information Officer sang Dumarao Municipal Police Station, iya ginpahayag nga base sa ila inisyal nga imbestigasyon, samtang yara sa talamnan si Rose, ginpadulongan ini ni Romel kag natabo nga pagbinaisay sa tunga sang duha.
Gilayon nga ginkuha sang suspect ang iya armas-luthang kag ginluthag si Rose, sunod man nga gintiro sini ang iya hinablos nga si Mark.
Gintinguhaan pa nga dal-on sa ospital ang mag-iloy apang ginbawian sang kabuhi bangud sa patal nga igo sa lawas.
Ginapatihan naman nga daan nga hiligut-anon ang nangin ugat sang nasambit krimen.
Sa subong, nagapabilin nga at-large ang person of interest kag padayon ang pag-imbestigar sang mga katapo sang kapulisan agud masolbar ang kaso.
