ROXAS CITY – Arestado ang mag-tiyo sa ginkasa nga drug buybust operation sang mga katapo sang Station Drug Enforcement Team sang Roxas City Police Station sa Barangay Tanque, Roxas City.
Ginkilala ang nadakpan nga sanday Carlo Roxas, 22 anyos kag Justine Roxas, 19 anyos, lunsay mga residente sang nasambit man nga barangay.
Narekober sa mga ini ang 9 tanan ka sachets sang ginapatihan shabu kag P500 nga marked money.
Suno kay Police Master Sergeant Ramil Arcangeles, tagpamaba sang Roxas City PNP, madugay na nga gina-monitor ang nasambit nga mga drug suspek bangud sa ila ilegal nga aktibidad.
Ginpahayag sini nga nangin malawig ang ila nga monitoring antes ginkasa ang amo nga operasyon.
Ginapahayag pa nga nagaserbi man nga drug-den ang balay nga ginateniran sang nasambit nga mga drug suspek.
Sa karon, nakaaresto na sa Roxas City Police Station ang nasambit nga mga drug suspek kag natalana nga pasakaan sang panumbungon nga paglapas sa Republic Act 9165.
