PRESIDENT ROXAS, CAPIZ – Nagapanawagan ang mga kapulisan sang President Roxas Municipal Police Station nga indi gid magmaneho sang motorsiklo ukon salakyan kun yara sa impluwensya sang makahulbog nga ilimnon agud makalikaw sa aksidente.
Ini kasunod sang natabo sa Sitio Bayes Brgy. Población sa nasambit nga banwa matapos nadulaan sang control ang mag-tiyo nga sakay sa motorsiklo kag nag-igo sa concrete marker.
Ang mag-tiyo amo sanday alyas “Jonathan”, 57-anyos, driver sang motorsiklo kag alyas “Francis”, 21-anyos, back rider kag lunsay residente sang Barangay Pantalan sa nasambit ng banwa.
Sa interview sang Bombo Radyo kay Police Major Alfred De Leon, hepe sang President Roxas Municipal Police Station, iya ginpahayag nga base sa ila imbestigasyon, halin sa ilimnan sa Barangay Ibaca ang mag-tiyo kag papauli na kuntani sa Barangay Pantalan apang nag-overshoot ang ila ginasakyan nga motorsiklo padulong sa concrete marker.
Gintinguhaan pa nga madala sa ospital ang mga biktima apang ginbawian gid sang kabuhi.
