ROXAS CITY – Arestado ang mag-ululutod matapos ginserbihan sang warrant of arrests sa gintingub nga puwersa sang Dao Municipal Police Station kag Sigma Police Station sa magkatuhay nga barangay sa banwa sang Dao, Capiz.
Nahibaluan nga una na ginserbihan sang warrant of arrest sang mga kapulisan sa Barangay Poblacion Ilawod sanday Ricky Baliscot, 42-anyos kag Edwin Baliscot, 28-anyos nga lunsay mga residente sang Barangay Duyoc sang amo nga banwa.
Sa pihak nga bahin, nadakpan man ang isa nila ka utod matapos ginserbihan sang warrant of arrest sang mga kapulisan sa Barangay Duyoc, Dao, Capiz.
Ginkilala ang suspek kay Ronie Baliscot, 33 anyos sang nasambit man nga lugar.
Ang nasambit nga mga persona magapangatubang sang panumbungon nga Frustrated Murder.
Ang nasambit nga warrant of arrests gin-isyu kag ginpirmahan ni Hon. Judith Orendain-Tonogbanua, Presiding Judge Branch 21, Mambusao, Capiz sadtong Enero 30, 2020.
Ginrekomendar naman sang korte ang P200,000 nga piyansa sa kada isa para sa temporaryo nga kahilwayan.
Samtang, nakahunong na karon sa karsel ang nasambit nga mga arestado.
