ROXAS CITY – Dakop ang mag-utod nga babaye sa ginkasa nga drug buybust operation sang Station Drug Enforcement Unit (SDEU) sang Roxas City Police Station sa Arnaldo Boulevard, Barangay Baybay, Roxas City.
Ginkilala ang mga naaresto nga sanday Marvy Apolinario, 31 anyos sang Barangay Tiza, Roxas City kag Shyrine Apolinario, 26 anyos sang Barangay Baybay.
Narekober sa posesyon sang mga naaresto ang lima ka sachets sang ginapatihan shabu, duha ka cellphone, kag P1000 nga marked money.
Ginpahayag ni Police Master Sergeant Ramil Arcangeles, tagpamaba sang Roxas City PNP, nga ang nadakpan nga mag-uto ang mga anak sang live-in partner ni John Laserna nga sadto anay nakapalagyo sa buybust operation nga ginkasa sa Sitio Pagutok, Barangay Milibili, Roxas City.
Mahibaluan nga humalin sang tinalikdan nga semana pa nga gina-monitor sang mga kapulisan ang duha ka mga drug personalities bangud sa pagduso sang ilegal nga druga.
Samtang ginpahayag naman ni Shyrine nga magabakal lang kuntani sila sang tsistirya bilang sumsuman sa ila nga pag-inom bangud birthday sang iya anak apang ginkakibot na lamang nila sang may nagpundo nga salakyan kag ginkuha ang iya nga cellphone kag nakibot ini sang nagdeklarar na ang mga pulis sang buybust.
Dugang pa nga alegasyon sang nadakpan nga si Marvy nga gindapal ini sang isa ka babaye nga katapo sang SDEU.
Sa karon magapangatubang sang panumbungon nga paglapas sa Republic Act 9165 ukon Comprehensive Dangerous Drugs Act of 2002 ang mga arestado.
