Naghingyo ang mag-utod nga Duterte sa Korte Suprema nga manduan ang mga opisyales sang gobyerno sang Pilipinas nga i-areglo ang pagpauli ni anay Presidente Rodrigo Duterte.
Ginsumiter ni Vice President Sara Duterte, Paolo Duterte, Veronica “Kitty” Duterte, kag Davao City acting Mayor Sebastian “Baste” Duterte ang ila memorandum sa Korte Suprema bilang kabahin sang consolidated petitions angut sa pagdakop sa anay presidente.
Sa petisyon nga ginpahayag ni Rep. Paolo Duterte pinaagi sa iya abogado nga si Atty. Harry Roque, nga indi makatarungan kag indi suno sa konstitusyon ang pagpapreso sa anay presidente.
Dugang pa niya, Isa ini ka aktwal nga kaso ukon kontrobersiya nga dapat solbaron sang Korte Suprema.
Mahimo man suno sa iya nga ideklarar sang Korte Suprema nga illegal kag unconstitutional ang pagdakop sa anay presidente.
Madumduman nga si Duterte ang yara sa gihapon sa kustodiya sang International Criminal Court (ICC) humalin pa sang Marso 2025 bangud sa kaso sang crimes against humanity may kaangtanan sa iya kampanya sa iligal nga droga sang siya ang presidente sang Pungsod Pilipinas.
