ROXAS CITY – Gindakop sang mga kapulisan ang mag-utod nga hubog nga naga bitbit sang ila matalom nga hinaniban sa Barangay Pangabuan, banwa sang Jamindan, alas 11:30 sang gab-i.
Ginkilala ang mag-utod nga sanday Rick Elias, 28-anyos, kag Fernando Elias, 25-anyos lunsay mga laborer kag residente sang nasambit nga barangay.
Suno sa mga katapo sang Jamindan MPS, samtang naga-patrolya ang mga ini, natalupangdan ang duha ka hubog nga gina-alegar naga maoy bitbit ang ila talibong.
Ginapahayag nga halin sa trabaho ang mag-utod bilang naga-ubra sang higot nga himo sa abaka.
Magapangatubang sang kaso nga paglapas sa Batasang Pambansa 6, ukon “Illegal Possession of Bladed, Pointed or Blunt Weapons.”
Sa karun nagapabilin ang mga ini sa kustodiya sang Jamindan MPS para sa nagakaigo nga disposisyon.
