ROXAS CITY – Arestado ang duwa ka mag-ulutod matapos ginserbihan sang separado nga warrant of arrest sang mga kapulisan sa Brgy. Odiong, Altavas, Aklan kag Brgy. Poblacion banwa sang Sapian.
Ginkilala ang mga nadakpan kay Janvee Basan, 22-anyos kag Dinmark Joi Basan, 25-anyos kag lunsay mga residente sang Brgy. Poblacion, Sapian, Capiz.
Kaso nga Attempted Homicide ang ginapangatubang sang mga arestado.
Matandaan sang Pebrero 15, 2022 ginbuno sang mag-utod si Vimar Gregorio sa natuo nga bahin sang likod samtang naga-”snacks” sa isa ka burger stand sa banwa sang Sapian.
Ang warrant of arrest ang ginpirmahan kag ginpapanaug ni Hon. Joevy Paclibar Valenzuela, Presiding Judge, MCTC, 6th Judicial Region napetsahan Mayo 2, 2022.
Ginrekomendar sang korte ang tag-P36,000 nga piyansa para sa temporaryo nga kahilwayan sang mga ini.
Sa karon, yara na sa kustodiya sang Sapian MPS ang naaresto nga mag-utod, para sa nagakaigo nga disposisyon.
