ROXAS CITY – Pilason ang mag-utod nga lalaki matapos nga naaksidente sa ginasakyan nga motorsiklo sa atubang sang duha ka mga car dealer store sa Pueblo de Panay, Barangay Lawaan, sini nga syudad.
Ginkilala ang driver sang Suzuki Smash 110 kay Rodelio Villaruz, 38-anyos, kag ang iya manghod nga backrider nga si Rey Villaruz, 30-anyos kag lunsay mga residente sang Brgy. Sibaguan, Roxas, City.
Sandig sa inisyal nga imbestigasyon ni PCpl. Ben Angel Celino sang Roxas City PNP, nagaguwa nga padulong sa direksyon sang Sibaguan ang ginasakyan nga motorsiklo sang mag-utod, apang nadulaan sang kontrol sa manubela ang driver rason nga naglapaw ini sa iya linya kag natumba.
Bangud sini, nadulaan sang alinto ang driver sang motorsiklo kag ginpadangat sa isa ka pribado nga ospital sang mga katapo sang CERT, samtang menor nga kapilasan sa kamot ang naangkon sang backrider.
Nahibaluan nga lunsay yara sa impluwensiya sang makahulubog nga ilimnon ang mag-utod.
