ROXAS CITY – Arestado ang duha ka mag-utod nga ginatudlo suspek sa pagkastigo-patay sa isa ka sakristan sa separado nga lugar sa banwa sang Panay.
Ginkilala ang mga arestado nga sanday Gerry Azares, 28-anyos kag Hargie Azares, 32-anyos lunsay residente sang Brgy. Anhawon sang nasambit nga banwa.
Sa pakig-angut sang Bombo Radyo kay PSSg. Bryan Zen Bacay, Chief Investigator sang Panay MPS, kaso nga homicide ang paga-atubangon sang mag-utod nga Azares kun sa diin ginrekomendar sang korte ang piyansa nga P120,000 sa kada isa.
Ang warrant of arrest ang ginpapanaug kag ginpirmahan ni Hon. Ignacio Alajar, Presiding Judge, RTC 6, Branch 18, Roxas,City napetsahan Hunyo 14, 2022.
Matandaan sang Enero 22, nagpadulong si Joey Dumangon sa balay sang iya gin-maninoyan kag naga-inom-inom sang may nagpatunga nga rambol kag ginpulihan-kastigo sang mga mag-utod ang biktima.
Natigayon nga makapalagyo si Dumangon apang Enero 24, nasapwan-patay ini sa kasubaan sa Sitio Pangpang, sa amu nga banwa.
Sa karon, yara na sa kustodiya sang Panay MPS ang mga suspek para sa nagakaigo nga disposisyon.
