PILAR, CAPIZ – Patay ang mag-utod nga kalalakinhan matapos nga bumunggo ang ila ginasakyan nga motorsiklo sa isa ka concrete road barrier sa Barangay Poblacion, Pilar, Capiz.
Ini ang ginpahayag ni Police Staff Sergeant Hilbert Dela Vega, imbestigador sang Pilar Municipal Police Station sang mainterview sang Bombo Radyo.
Ginkilala ang mga biktima nga sanday Ronelo Benjamin, 35 anyos kag Albert Benjamin, 32 anyos, lunsay mga residente sang Barangay Cayos sang nasambit nga banwa.
Suno kay Dela Vega, lunsay nakainom ang mga biktima gikan sa isa ka binaylehan kag pauli na kuntani ang mga ini sakay sa motorsiklo.
Bangud sang kahulugbon, ginapahayag nga nadulaan sang kontrol sa manubela ang driver sang motorsiklo rason nga bumunggo ini sa isa ka concrete road barrier.
Ginapahayag nga nabali ang tiil ni Ronelo samtang nalampos naman ang ulo ni Albert.
Gindala pa sa ospital ang mga biktima apang lunsay ginpangdeklarar nga dead on arrival.
