Mag-utod patay matapos malumos sa suba

ROXAS CITY – Patay ang mag-utod matapos nga malumos sa suba sa Barangay Poblacion Tabuc, Maayon Capiz.

Ginkilala ang mga biktima nga sanday Alyas Joy walo ka tuig ang edad kag Juana napulo ka tuig ang edad mga residente sang Barangay Agloway, Panitan, Capiz.

Nagaguwa sa imbestigasyon sang pulisya nga yara sa kilid sang suba ang mag-utod kag nagahampang.

Wala nadiparahan sang ila nga lola nga nagkadto sa madalum nga bahin sang suba ang mag-utod kag aksidente nga nalunod.

Gilayon nagbulig ang mga tawo sa lola sang biktima kag gindala sa ospital ang mag-utod.

Apang sa malain nga palad, ginbawian sila sang kabuhi.

Padayon sa karon ang imbestigasyon sang pulisya sa insedente.