PANAY CAPIZ – Pilas sa magkatuhay nga parte sang lawas ang naangkon sang mag-utod matapos ginapahayag ginpangbuno sang isa sa mga abyan sini sa Barangay Lus-Onan, Panay, Capiz.
Ginkilala ang mag-utod nga sanday alyas “Ife”, 50-anyos, kag alyas “Romy”, 35-anyos, lunsay mga residente sang Barangay Lus-Onan, Panay, Capiz, samtang ang ginapahayag suspek ang ginkilala kay alyas “Von”, 37-anyos, kag residente sang Brgy. Olalo Pilar, Capiz apang temporaryo nga nagapuyo sa banwa sang Panay.
Sa interview sang Bombo Radyo sa hepe sang Panay Municipal Police Station nga si PCpt. Ronald Ton ogan, ginpahayag sini nga sang natabo ang insidente nagsugat-anay ang mga biktima nga papauli na kuntani kag ang suspek.
Suno diri nga hinali lamang may nagpatunga nga indi pag-intindihanay sa isa sa mga biktima kag natalupangdan sang utod sini nga may gina-uyatan nga kutsilyo ang suspek kabangdanan nga iya ini ginlampusan sa ulo kag kamot agud kuntani mabuy-an ang kutsilyo apang napaslawan ini.
Matapos sini, didto na kag ginbuno sang suspek ang mag-utod nga naigo sa magkatuhay nga parte sang ila lawas.
Gilayon man ang mga ini ginrespondihan kag ginpadangat sa ospital para sa nagakaigo nga pagbulong.
Mahibaluan nga lunsay yara sa impluwensya sang makahulubog nga ilimnon ang magtimbang nga bahin kag ginapatihan daan nga hiligut-anon ang ginalantaw nga motibo sa pagpangbuno.
Samtang, natigayon naman nga makaguha sa presohan ang suspek matapos magtakop ang reglementary period sini.
Sa karun, nagapabilin sa Roxas Memorial Provincial Hospital ang mag-utod agud magpaayo matapos ang nagluntad nga insidente.
