ROXAS CITY – Pilason ang mag-utod matapos nga ginaalegar nadaplisan sang armas luthang kag naigo sang bato sa Barangay Lanot, Roxas City.
Ginkilala ang mga biktima nga sanday Vince Perpose 24-anyos kag ang 13-anyos nga wala na ginhingadlan nga menor de edad nga lunsay mga residente sang nasambitan man nga lugar.
Base sa inisyal nga imbestigasyon sang mga kapulisan nga ginaalegar nagpalupok sang armas luthang ang suspek nga si Pedro Bares gamit ang home made shotgun sini nga pusil rason nga nadaplisan sa iya nawala nga kilid si Vince.
Magluwas diri, naigo man sang ginhaboy nga bato ang utod sini nga menor de edad rason nga nag-angkon man ini sang pilas sa lawas.
Gilayon naman nga gindapatan sang nagakaigo nga pagbulong ang pilas nga naangkon sang mga biktima.
Bangud diri, ginpakamaayo na lamang sang mga biktima nga iparekord sa pulisya ang natabo.
Samtang ginpanginwala naman sang suspek ang alegasyon sang mag-utod.
