Nagpalab-ot sang reklamo ang isa sa mga pumuluyo sang Barangay Santa Fe sa banwa sang Pilar, matapos ginapahayag nga nagpanghana nga maglampos sang baseball bat ang ila Barangay Kagawad sa ila.
Sa interview sang Bombo Radyo kay Jennifer Ardeña, ginpahayag sini nga sang natabo ang insidente nagakinasadya sila kaupod ang ila mga kasilingan bangud may yara sang kaadlawan.
Suno kay Ardeña, sa una palang nila nga pag-videoke ginpatawgan na sila ang pulis takna alas 5:00 sang hapon bangud ginapahayag nga may yara sang nagcomplain sa ila barangay.
Apang suno sa iya wala sila sang may nabaton nga reklamo nga nagapahayag nagatuga sila sang disturbo kag perwisyo sa ila palibot kag wala man sila ginpatawag agud kun tani nga sabton ang amu nga reklamo sa ila barangay sa baylo nga ginchat lamang suno diri sang opisyales ang ila kaingud balay nga untatan na nila ang ila pag-videoke.
Mahibaluan nga nagpadulong sa lugar sanday Barangay Kagawad Loreto Morales kaupod ang iya asawa, secretary sang barangay kag 9 ka mga BPAT.
Pahayag pa ni Ardeña nga sang nakita niya ang mga opisyales nagtamyaw pa ini sa ila apang wala sila nagalaum nga sa pagpalapit palang ni Morales nangin mainit na ang iya mga ginpangbuy-an nga tinaga kag naghana pa nga maglampos sang baseball bat.
Dugang pa sini nga matapos ang ila pagsabtanay ginpakamaayo na lamang nila nga untatan na ang pagvideoke apang naghirit pa ang nasambit nga brgy. kgwd nga mas maayo suno sa iya nga untatan na lamang ang ila pag-inum-inum butang nga wala nila gintugutan bangud suno sa tagreklamo nga ang pagvideoke lamang ang ila ginareklamo gani indi na kinahanglan pa pag-intrahan ang ila pag-inum-inum bangud wala man ini sila nagatuga sang gamo.
Samtang, bukas ang istasyon sang Bombo Radyo Roxas sa mangin sabat ni Barangay Kagawad Loreto Morales angut sa nasambit nga reklamo.
