ROXAS CITY – Nangin agresibo kag istrikto sa pagpatuman sang precautionary measures ang Kingdom of Thailand rason nga amat amat na nga nagnubo ang numero sang mga nalatnan sang coronavirus disease 2019.
Sa report ni Bombo International correspondent Kenneth Malacad, tumandok sang Sta. Fe, Romblon kag nagatrabaho bilang foreign language teacher sa Thailand, ginpahayag sini nga mas ginhugot pa sang gobyerno ang quarantine protocols kasubong sang pagsarado sang border bangud kilala nga exit point ang Thailand sang pila ka mga pungsod, mandatory nga paggamit sang mask sa tagsa ka magguwa sa balay.
Hugot man nga ginapatuman ang curfew nga nagasugod alas10 sa gab-I tobtob alas 4 sang kaaganhon kag ang sin-o man nga mangin pasaway sa curfew kag social distancing policy magabayad sang multa nga 20,000 tobtob 40,000 baht katumbas ini sang P70,000 sa Philippine peso.
Dalayon naman nga ginpauntat ang biyahe sang mga provincial buses kag temporaryo nga ginpasarado ang mga hotels kag shopping malls.
Nahibaluan pa nga ginpreparahan sang Thailand ang COVID-19 pandemic, bangud libre ang hospitalization sang mga COVID-19 patients kag pananglitan nga makabatyag sang sintomas sang amo nga balatian, mahimo lamang nga magtawag sa ginhatag nga hotline kag mismo ang mga frontliners na ang magapadulong sa balay kag magapatigayon sang testing.
May ginahatag man nga financial support ang gobyerno sa mga nadulaan sang trabaho.
Samtang suportado sang Thailand ang tanan nga kinahanglanon sang ila mga frontliners sa diin kumpleto sila sa mga Personal Protective Equipment para masiguro man ang ila nga kaluwasan.
