ROXAS CITY – Arestado ang magbayaw matapos nga ginaalegar nagpalupok sang armas luthang sa Barangay Badiangon, Pres. Roxas Capiz.
Ginkilala ang mga suspek nga sanday Gilbert Bacero 36-anyos sang Barangay Badiangon kag Marlon Bacoy 27-anyos sang Barangay Yating sang nasambit nga banwa.
Base sa inisyal nga imbestigasyon sang mga kapulisan nga ginaalegar nagpalupok sang armas luthang ang nasambit nga mga suspek sa lugar.
Nahibaluan nga nakabaton sang panawag ang mga pulis gikan sa isa ka concerned citizen nga may yara sang duha ka mga persona nga nagapalupok sang armas luthang sa ila lugar.
Gilayon naman nga nagresponde ang mga pulis kun sa diin narekober nila mismo sa posisyon sang mga suspek ang isa ka calibre .38 nga revolving nga may duha ka mga bala.
Nahibaluan nga yara sa idalom sang impluwensya sang makahulubog nga ilimnon ang duha sang natabo ang insidente.
Bangud diri, natalana naman nga pasakaan sang panumbungon nga paglapas sa RA 10591 ukon Comprehensive Law on Firearms and Ammunition ang nasambitan nga mga suspek..
