ROXAS CITY – Pilason nga ginpadangat sa Roxas Memorial Provincial Hospital ang duha ka mga lalaki , matapos ang natabo nga pagnilab-anay sa Barangay Ondoy, Ivisan, Capiz.
Ginkilala ang mga naulamid nga mga persona nga sanday Pablo Balboa, 64 anyos, Doroio Dolor, 51 anyos kag Rogelio Valdicate 56 anyos, nga lunsay mga residente sang nasambit nga barangay.
Sandig sa inisyal nga impormasyon nga nakuha sang Bombo Radyo sa Ivisan MPS, nagpadulong sanday Balboa kag Dolor sa balay ni Valdicate, nga lunsay may ginabitbit nga mga hinganiban, kag sa pag-abot nila sa ugsaran palang ni Valdicate, nagluntad na ang komusyon nga gintunaan sang ila pag-inaway.
Naigu sang pagpanglabo sa iya natuo nga kamot si Balboa, pilas sa ulo ang naangkon sang tagbalay nga si Valdicate, samtang wala napilasan si Dolor.
Ginaalegar nga away sa duta ang ginhalinan sang kinagamo, sang mga maghimata.
Sa karon, padayon pa ang imbestigasyon sang mga katapo sang Ivisan MPS sa natabo nga insidente.
