ROXAS CITY – Ginpamatud-an sang magkahagugma nga sanday Marwin Custodio 27-anyos kag Mabel Custodio sang Barangay Cogon Ilawod, Panay ang paghigugma sa isa kag isa matapos nga nagpakasal sa pihak sang ginasuprer nga balatian nga osteosarcoma stage 4 cancer sang lalaki.
Madamo sa mga nagsaksi sa pagtambi palad sang duha ang nagtulo ang luha matapos natandog sa nakita nga daku nga paghigugma nanday Marwin kag Mabel nga ginpamatud-an nga indi upang ang balatian para mahatagan sang katumanan ang ila madugay na nga handum nga magpakasal.
Sa exclusive interview sang Bombo Radyo kay Mabel, ginpahayag sini nga isa sa pina-memorable nga hitabo sa iya kabuhi nga indi malimtan amo ang ila kasal sang bana sa diin indi sini mapaathag ang kalipay nga nabatyagan.
Aminado man ini nga may kasubo kag kahadluk nga nabatyagan bangud sa sitwasyon sang bana nga kinahanglan ang oxygen tank agud makaginhawa sang maayo.
Apang pangamuyo sa Ginoo ang iya ginasandigan sa karon agud mangin mabakud kag maisog kun ano gid man ang matabo.
Ginpahayag sang ginang nga madugay na sila nagaplano nga magpakasal apang gin-una nila ang pagpabulong ni Marwin.
Apang nahibaluan nga mismo si Marwin ang naghinyo nga dayunon ang ila kasal agud mangin legal ang ila pag-upod bilang mag-asawa.
Samtang saksi man sa walo ka tuig nga paghigugmaanay sang mag-asawa nga Custodio ang ila mga mga himata kag kaingud balay nga daku man ang nangin partisipasyon agud mangin memorable ang kasal sang duha.
Nahibaluan nga duha na ka tuig nga nagapakigbato sa balatian nga osteosarcoma cancer si Marwin, apang ginpakigbatuan sini ang sakit para sa iya asawa kag duha ka mga kabataan nga nagapang-edaron sang anum ka tuig kag isa ka tuig.
Sa karon wala ginalikawan ni Mabel nga magpanumdum sang negatibo nga bagay sa sitwasyon sang bana, sa baylo ginapangamuyo sini nga magdugay pa si Marwin agud mangin magkaupod sila sa pagpadaku sa ila mga kabataan.
