Nagresulta sa trahedya ang masadya kuntani nga outing sang anom nga magkasilingan matapos mabunggoan sang isa ka pickup truck ang ginasakyan nga tricycle sang mga biktima sa San Fabian, Pangasinan.
Papauli na kuntani sa banwa sang Mangaldan ang mga biktima matapos maghalin sa isa ka beach sa San Fabian sang matabo ang insidente.
Sa imbestigasyon sang kapulisan, ginaalegar nag-overtake ang pickup truck sa isa pa ka salakyan apang wala sini matalupangdan ang tricycle nga ginasakyan sang mga biktima nga yara sa iya tupad.
Nabunggoan kag gin-araro sang pickup truck ang tricycle sang pila ka metro ang kalayuon.
Nagresulta ini sa pagkapatay ang tatlo ka biktima, kag napilasan ang tatlo ka iban pa, lakip na ang driver sang tricycle, nga nagapaayo pa sa ospital.
Yara na subong sa kapulisan ang 25 anyos nga driver sang pickup.
