Arestado ang maglive-in partner matapos nga nadakpan sa ginkasa nga drug buybust operation sa Block 1, Malipayon Village Barangay Tiza Roxas City.
Ginkilala ang mga arestado nga sanday Nestor Dumulong 32-anyos kag Lanie Sonico 41-anyos lunsay residente sang nasambit nga lugar.
Nakuha sa posesyon kag kontrol sang mga suspetsado ang lima tanan ka mga plastic sachets sang ginapatihan shabu, P1,000 nga marked money kag pila ka mga drug paraphernalias.
Samtang aminado si Dumulong nga nagagamit ini sang iligal nga droga apang isa na ka tuig nga nag-untat.
Kasunod sini, ginpanginwala ni Dumulong nga ginapag-iyahan sini ang narekober nga mga shabu.
Samtang ginkalipay naman ni Barangay Kagawad Gigi Obera nga nadakpan ang mga suspetsado.
Suno kay obera nga madugay na ini nga nakabaton sang reklamo gikan sa mga residente nga masami may nagasulod nga wala matumod nga mga persona sa lugar.
Ginkumpirma man ni Obera nga madugay na nga ginamonitor sang barangay ang duha ka mga arestado.
Ginpabutyag naman sang Team Leader sang Regional Drug Enforcement Unit ukon RDEU nga duha ka semana nga ginmonitor ang mag-live in partner nga yara sa listahan sang Barangay Anti-Drug Abuse Council ukon BADAC apang wala nagsurrender sa baylo nagpadayon sa pagduso sang iligal nga droga.
Sa karun yara na sa kustodiya sang RDEU ang duha ka mga suspetsado kag natalana nga pasakaan sang panumbongon sa paglapas sa R.A. 9165 ukon Comprehensive Dangerous Drugs Act of 2002.
