Ginkalipay ni Speaker Ferdinand Martin G. Romualdez ang pagpirma ni President Ferdinand R. Marcos Jr. sa Republic Act (RA) No. 12021 ukon An Act Providing for the Magna Carta of Filipino Seafarers.
Nakasaad sa Magna Carta of Filipino Seafarers ang mga kinamatarong kag responsibilidad sang mga Pilipino nga marino, kuwalipikasyon, terms of employment, edukasyon kag kinahanglanon nga training.
Tinutuyo sang layi nga makadungan ang sa subong nga regulasyon sa nagabag-o nga pangkalibutanon nga basehan, suno sa lider sang Kamara de Representantes nga may yara sang masobra 300 ka representante.
Tion man suno diri ang pagpirma sang layi bangud natuon ini sa selebrasyon sang Maritime Day sa Huwebes.
Suno pa kay Speaker Romualdez, protektahan man sang Magna Carta of Filipino Seafarers ang mga kababainhan nga marino sa diskriminasyon.
Magluwas sa pagsuporta sa ila nga mga pamilya, daku man ang amot sang mga Pilipino nga marino sa foreign exchange remittances sang pungsod.
Pila sa mga probisyon sang layi, ang natuhoy sa kinamatarong kag katungdanan sang mga marino, mga kababainhan sa maritime industry, emergency rescue sang domestic seafarers, manning levels kag crew competency requirements, terms and conditions sang ila nga trabaho; akomodasyon kag pagkaon, Medical care, inspection kag enforcement, green lane para sa overseas and domestic mariners, requirements para sa mga Philippine-registered ships sa shipboard training, insentibo kag awards nga ginahatag sa maritime industry, repatriation, reintegration, edukasyon kag training, kag resolusyon sang mga indi pag-intindihanay.
Nagapati naman si House Deputy Majority Leader kag Tingog Partylist Rep. Jude Acide, chairman sang House Committee on Overseas Workers Affairs, nga madinalag-on nga masabat sang layi ang mga isyu sang foreign employers pag-abot sa edukasyon, training kag competency sang Filipino seafarers.
