ROXAS CITY – Wala sang bayad kun magpa-dialysis sa Roxas Memorial Provincial Hospital (RMPH).
Ini ang ginkumpirmar ni Dr. Florencio Luching, OIC sang nasambit nga ospital, sang mainterview sang Bombo Radyo.
Suno diri, wala sang ginabayaran ang nagapa-dialysis nga pasyente bangud cover ini sang PhilHealth kag ang mabilin ang iga-charge sa medical assistance fund sang Department of Health (DOH) apang may yara sang mga kagamitan nga wala na sang suplay ang ospital kag kinahanglan nga baklon sa guwa kaangay sang bloodlines.
Kaangot diri, sa 10 ka mga dialysis machines, 7 na lang diri ang operational kag 3 ang guba bangud sa kadugayon na sang mga makinarya kag tatlo ka beses sa isa ka adlaw ini ginagamit sang pasyente.
Pahayag sini nga nagsiling si Governor Fredenil Castro nga igapakay-o ang amu nga mga makinarya agud makabulig sa mga naga-dialysis apang, suhestyon ni Luching nga sa baylo nga e-repair ang mga guba nga machines islan na lang ini sang panibag-o kag dugangan ang unit tubtob 15 agud maakomodar ang iban nga mga pasyente kag e-renovate ang lugar kag iimprobar ang water source.
Samtang, magapatigayon man sila sang maid-id nga reclassification agud mahatagan sang ti-on nga makapabulong ang mga miyembro sang indigent.
