Nagakabalaka ang mga himata sang isa ka pamilya nga sakay sang motorbanca nga naabtan sang pagpanalasa sang bagyo nga Jolina sa tunga sang lawod sa may bahin sang isla sang Sapatos gamay nga sakup sang Roxas City.
Ginkilala ang mga ginapahayag ‘missing’ tubtob sa karon nga sanday Romeo Bataican, 36-anyos; Rhoda Moncillo, 35-anyos; mga kabataan nila nga sanday Roldan Bataican, 19-anyos; Romelyn Bataican, 14-anyos; Romeo Bataican Jr. 10-anyos kag RB Bataican, 5-katuig; mga hinablo nga sanday Rico Pablo, 9-katuig kag Marlon Bataican Pablo, 6-katuig.
Sa interview sang Bombo Radyo kay Wenelyn Bataican kag Michael Bataican Espeloy, nga taga-Brgy. Banica, sini nga syudad kag mga gumangkon sang nasambit nga mag-asawa, padulong ang tatlo ka magpamilya sakay sa 3 ka mga motorbanca sa Bangkal, Carles, Iloilo agud mag-evacuate bangud sa bagyo.
Nakaabot nga hilway ang duha ka mga sakayang-pandagat sa ila pakadtuan apang ang motorbanca sang pamilya Bataican ang wala pa sa gihapon makaabot sa ila pakadtuan tubtob nga nagdulom na.
Nahibaluan nga ang motorbanca nagaduag berde kag puti nga may pangalan ‘To RB’ kag sarang nga makasakay ang kapin 20 ka mga persona.Nagpakig-angut naman ang pamilya sa Philippine Coast Guard sang Capiz, Iloilo kag Masbate apang tubtob sa karon, wala sa gihapon sang balita kun na-rescue na ang mga ini.
