Patay ang 56-anyos nga lalaki matapos gintiro sang kaugalingon nga manghod sa Sitio Banahaw, Barangay San Juan, Jamindan, Capiz.
Ginkilala ang biktima kay Erwin Lorenzo nga nag-angkon sang samad sa natuo nga bahin sang tiyan samtang ang manghod nga suspek amo si Jerry Lorenzo sang amo man nga barangay.
Ginpahayag ni Police Staff Sergeant Lou Jacinto Robles, imbestigador sang Jamindan PNP nga nagaguwa sa inisyal nga imbestigasyon nga magkaupod pa ang mag-utod nga nag-inum antes ang krimen.
Apang sa wala ginalauman nagpatunga ang mainit nga diskusyon sa mag-utod kag ginaalegar nga hinali nga gintiro sang suspek ang biktima gamit ang wala mahibaluan nga armas.
Madasig nga nagpalagyo ang manghod matapos ang krimen.
Sa karon yara sa isa ka punerarya ang bangkay sang magulang nga napatay bangud sa patal nga pilas nga naangkon.
