ROXAS CITY – Ginhatuk hatuk labo sang manghod ang iya magulang sa sulod sang ila nga balay sa Barangay Batiano, Mambusao, Capiz.
Patay ang biktima nga si Ma. Neta Lapso nag-angkon sang madamo nga kapilasan sa lawas matapos hatuk hatukon sang labo sang kaugalingon nga manghod nga suspek nga si Rodelio Lapso.
Sa interview sang Bombo Radyo Roxas kay PO2 Lord Amosig, imbestigador sang Mambusao PNP, ginpahayag sini nga nakaabot lamang sa ila balay ang biktima sang sugataon ini sang pagpanglabo sang utod.
Nasaksihan mismo sang ila nga iloy ang hitabo apang sang makita ini sang suspek, ini naman ang gin-atubang kag ginlagas gamit ang sanduko.
Apang maswerte nga nakapalagyo ang iloy kag nagpangayo ini sang bulig sa ila mga kasilingan kag mga opisyales sa barangay.
Bangud sa madasig nga pagresponde sang mga tanod kag mga barangay officials gilayon nga naaresto ang suspek nga karon napresi na sa bilangguan.
Nahibaluan nga indi lamang ang kaugalingon nga utod sini ang ginpatay sang suspek, bangud napreso man ini matapos ginpatay ang asawa kag anak.
