ROXAS CITY – Nakaguwa na ang suspek nga magulang nga nagbuno sa iya nga manghod sa Hermano Subdivision, Barangay Punta Tabuc, Roxas City.
Ini matapos nga wala na sang plano nga magpasaka pa sang panumbungon ang pamilya batuk kay Anthony Aluad Deocampo 38-anyos sang nasambit nga barangay.
Sa interview sang Bombo Radyo kay Anthony nga nag inom-inom sila kaupod ang ila mga abyan bangud may yara sang ginaselebrar nga kaadlawan sa ila lugar.
Apang, sang yara si Anthony sa sulod sang ila balay hinali na lamang nga nagsulod ang biktima nga si Albert Aluad Deocampo 29-anyos kag ginlamposan ang suspek sang botelya sa nawong.
Bangud diri, nagbalos ang magulang rason nga ginbuno sini ang manghod sa tiyan gamit ang buka nga botelya.
Nag-angkon naman sang pilas sa nawong ang suspek samtang pilas naman sa tiyan kun sa diin ginapahayag nga naguwa gid ang iya kasudlan.
Sa karon, padayon nga ginabulong si Albert sa isa ka pribado nga ospital kun sa diin ginatughungan na subong sang dugo kag yara sa kritikal nga kondisyon.
Ginpahayag naman ni Anthony nga wala man ini nagadumot sa manghod kag bisitahan niya pa ini sa ospital .
Suno naman sa isa ka BPAT member nga nakabaton na lamang sila sang impomasyon nga may yara sang kinagamo sa nasambit nga lugar.
Apang, si Anthony na lamang ang naabtan nila bangud si Albert ang gindala naman sa ospital.
Ginpakamaayo na lamang nila nga tawgan sang RCERT agud dapatan man sang pagbulong ang naangkon nga pilas ni Anthony.
Samtang, nakahanda naman nga mag-assist si Punong Barangay Nestor Buenviaje sa problema sang mag-utod.
Nagpanawagan naman ini sa mga residente sa ila barangay nga kun mahimo likawan ang kasubong sini nga kinagamo.
