ROXAS CITY – Ginbawian sang iya hulam nga kabuhi, samtang ginabulong sa isa ka ospital ang amay nga ginapahayag ginbuno sang iya kaugalingon nga anak samtang padayon naman nga ginabulong sa ospital ang manghod sini sa Barangay Bito-on Ilawod, Cuartero Capiz takna 1:35 sang hapon kahapon Oktobre 2, 2023.
Ginkilala ang mga biktima nga sanday Jorie Sibog 24-anyos kag Ruben Sibog 53-anyos samtang ang ginapahayag suspek amu si Joven Sibog 30-anyos nga lunsay residente sang nasambit nga lugar.
Sa impormasyon nga nakuha sang Bombo Radyo nagikan sa Cuartero Municipal Police Station, ginapahayag nga nakainum sang makahulubog nga ilimnon ang suspek kag may nagluntad nga indi pag-intindihanay sa tunga sang mag-amay.
Ginapahayag man nga bangud sa kahulugbon, aksidente nga nabuno sang 30-anyos nga magulang ang iya amay kag manghod sini gamit ang kutsilyo.
Mahibaluan nga nag-angkon sang pilas sa magkatuhay nga parte sang lawas sanday Jorie kag Ruben nga madasig naman ginpadangat sa pinakamalapit nga ospital agud dapatan sang nagakaigo nga pagbulong.
Samtang, madasig naman nga nakapalagyo si Joven matapos ang insidente apang natigayon man ini nga madakpan matapos ang ginkasa nga hot pursuit operation sang mga kapulisan.
Tuman naman ang paghinulsol sang suspek kag ginapahayag nga nadala lamang ini sa tuman nga kahulugbon.
Sa karon, nagapabilin pa si Jorie sa ospital bangud sa naangkon nga pilas tuga sang pagpangbuno kag yara naman sa isa ka punerarya ang bangkay sang amay.
