CUARTERO CAPIZ – Maisog nga ginhangkat sang isa sa mga magulang ni Mr. Raian Francisco, negosyante nga ginapahayag biktima sa pagpanghold-up ang katapo sang Cuartero Municipal Police Station nga magpaguha kag magpakita sang ebidensya sa mga alegasyon nga ginahaboy batuk sa iya manghod.
Sa exclusive interview sang Bombo Radyo kay Mr. Andres Francisco, ginpahayag sini nga tuman siya nga nadismaya sa ginpakita nga aksyon sang mga kapulisan bangud wala siya nagalaum nga himuan pa sang mga istorya ang iya manghod sa baylo nga magpatigayon kuntani sila sang maid-id nga imbestigasyon.
Ini matapos ila mabatian ang nangin pahayag ni PCPT. Alladen Talaban, hepe sang Cuartero Municipal Police Station nga wala sang kamatuuran nga ginhold up ang iya manghod bangud base sa ila imbestigasyon nagaguha nga madamo sang utang, kag nagabisyo sa pagsugal ang biktima.
Butang nga hugot nga ginpanginwala sang magulang bangud suno sa iya simple lamang sila nga indibidwal kag sila mismo ang makapamatuod suno diri nga negosyo lamang ang ginakasakuan sang ila manghod.
Mensahe sini sa katapo sang Cuartero MPS, ilabi na sa hepe nga kuntani indi basta-basta magpati sa mga kutso-kutso sa palibot kag kuntani magpatigayon sang maid-id nga imbestigasyon may kaangtanan sa nagluntad nga insidente
