ROXAS CITY – Nagpalab-ot sang hibubun-ot ang pila ka jeepney drivers may biyahe Dao/Cuartero-Roxas City angut sa sitwasyon sang ila pagbiyahe.
Sa interview sang Bombo Radyo kay “Bartoloy” Narciso, ginpahayag sini nga malayo kag dako na ang diperensiya sang ila napauli sa ila pamilya nga kita nagikan sa pagpamasahero.
Kun sadto anay suno diri antes ang pandemya, nakapauli pa ini sang P3,500 tubtob P3,800 kada semana, sa karon, pinakadako na ang mapauli nga P1,500 sa kada semana nga pagbiyahe.
Isa sa ginalantaw sini nga kakumptensiya sa mga pasahero amu ang Ceres bus.
Ang ila panawagan nga kuntani may bus stop ang mga ini nga dira lamang makapick-up sang pasahero, kag kun ila ruta nga Dao/Cuartero ihatag nalang kuntani sa mga jeep, bangud sa ila nanotisyahan nga kun magdungan ang bus kag jeepney, mas ginapili sang pasahero nga magsakay sa ceres bus.
Ginpakigbahin man sini nga nagikan sa 22 ka mga units sang jeep sa nasambit nga ruta, sa karon katunga nalang ang mga nagabiyahe bangud sa kahinaon sang pasahero.
Aminado man ini nga wala pa mabalik sa anay P40 nga plete padulong sa Cuartero sa tion sang antes ang pandemya, kag nagapabilin ini sa karon sa P60 nga pagsuloktan.
Samtang, sa bus, may plete nga P74 ang padulong sa Cuartero.
