ROXAS CITY – Nagapati ang barangay official sang Barangay Baybay, Roxas City nga mahuyang kag wala sang pundasyon ang guardrails nga ginpahamtang sa bypass road malapit sa Roxas Airport rason nga madasig man ini nga nagkalahapay kag nagguba.
Sa interview sang Bombo Radyo kay Punong Barangay Erwin Oroceo, iya ginpahayag nga sadto pa lang Nakita na niya nga indi manami ang pag-ubra sang proyekto rason nga ginmuno pa niya ini sa isa sa mga trabahador.
Apang ginsabat lang siya sang trabahador nga wala man sila sang may mahimo bangud nagasunod lamang sila sa mandu.
Ginapahayag nga ang proyekto ang yara sa idalom sang Capiz 1st District Engineering Office sang Department of Public Works and Highways.
Suno kay Oroceo, madamo na sang mga guardrails ang nagkalatumba sa lugar humalin pa sang wala mabuksan ang bypass road.
Pahayag niya, ginabanta tatlo na ka tuig ang amo nga guardrails kag ginalantaw sini nga indi mapag-on.
Nagalaum ang punong barangay nga mabutangan liwat sang mabakod nga guardrails ang bypass road agud malikawan ang mga aksidente.
Nahibaluan nga may yara na sang mga warning device nga ginpangbutang ang DPWH sa lugar agud mahatagan sang paandam ang mga motorista nga nagalabay sa baypass road.
