ROXAS CITY – Tuman ang kainit nga nabatyagan sang mga pumuluyo sa pungsod Japan bangud sa padayon nga pagtaas sang temperatura.
Ini ang ginpahayag ni Mr. Josel Palma, Bombo International Correspondent sa Japan sang mainterview sang Bombo Radyo.
Suno diri, ginakabalaka sa karon sang gobyerno sang nasambit nga pungsod nga madamo pa ang posible mabiktima sang heatstroke kag iban pa nga mga balatian nga makuha sa tuman nga init.
Dugang pa ni Palma, sa bahin sang Tokyo ang mas nakaeksperyesya sang tuman nga init kun sa diin narekord ang 40 degrees celcius nga temperatura sang nakaligad nga sabado kag padayon pa ang pagtaas sini sa sulod sang 5 na ka adlaw nga wala naganubo sa 35 degrees celsius.
Una ini nga narekord nga init humalin pa sang Hunyo 1875 kun sa diin 150 ka tuig antes narekord sa liwat ang mas mataas pa nga temperatura gikan sa Japan Meteorological Agency.
Ginabulubanta 46 na ka tawo ang gindala sa ospital nga ginapatihan may sintomas sang heatstroke, duwa diri ang malala ang kahimtangan, samtang kahapon nga adlaw isa ka 94-anyos nga persona ang gindala sa ospital apang gindeklarar nga dead on arrival rason sang madugay ini nga nagpahamtang sa iya kwarto nga mainit, naguha sa resulta nga heatstroke ang ginkapatay sini.
Nagpangabay man ang gobyerno sang Japan sa publiko kag sa mga kompaniya nga magtipid sa paggamit sang kuryente apisar tuman na ang init nga ila nabatygan bangud kun dulungan, mag-angkon sang shortage nga 5% sa kuryente kag magresulta sang brownout.
Masuwerte nga wala sang mga pinoy ang nabalhag nga naospital bangud sa mataas nga temperatura kag nagahimo naman sang tikang ang gobyerno nga mapahagan-hagan ang init nga nabatyagan pinaagi sa pagsuplay sang malamig nga energy drinks kag tsaa.
Nagapangabay man suno diri ang embahada sang Pilipinas nga sundon ang advisory sang Japan government agud malikawan ang posible balatian nga makuha sa tuman nga init.
Panugyan ni Palma sa mga Pilipino nga may kaparyintehan sa Japan, indi magkabalaka bangud maayo ang ila kahimtangan kag maghalong man diri sa Pilipinas bangud sa abnormalidad sang panahon, suno pa diri, prevention is better than cure.
