Nagpabutyag sang pagkadismaya ang Makabayan bloc sa mga detalye sa nagapadayon nga impeachment trial kay Vice President Sara Duterte, partikular ang gina-alegar indi maayo nga paggamit sang confidential funds sang Office of the Vice President kag sang Department of Education.
Sa interview sang Bombo Radyo kay France Castro, former ACT Teachers Party-list Representative, iya ginpahayag nga makahalanusbo ang mga ginatalakay sa impeachment court angut sa paggamit kag liquidation sang confidential funds.
Nangin sentro man sang ila pagkadismaya ang testimonya sang Commission on Audit (COA) Supervising Auditor Xylene Mae del Campo.
Suno kay Castro, makakilibot nga isa si Bise Presidente Duterte sa mga opisyal nga ginakabig responsable sa ₱73.287 million nga confidential fund expenditures sang OVP nga wala ginpahanugutan sang COA.
Lakip man sa mga accountable officers amo sanday Special Disbursing Officer Gina Acosta kag Chief Accountant Julieta Villadelrey.
Dugang pa sang natungdan, importante nga klaruhon kon paano gingasto ang amo nga mga pundo, kon sin-o ang nakabaton sini kag kon ang mga dokumento nga ginsumiter bastante na agud pamatud-an nga ang kuwarta gingamit para sa awtorisado nga kompidensyal nga mga hilikuton.
