Ginpanindugan sang Makabayan Bloc nga husto ang desisyon sang House prosecution panel nga indi na pag i-present ang Article III ukon bribery alegation batok kay Vice President Sara Duterte sa impeachment trial.
Sa interview sang Bombo Radyo kay anay ACT Teachers Partylist Representative France Castro, iya ginpahayag nga dapat i-respeto ang desisyon sang prosecution panel, ilabi na nga nagapati ang mga ini nga bastante na ang ila ginpresentar nga ebidensya sa iban pa nga Articles of Impeachment.
Pormal na nga ginkumpirma sang House prosecution panel nga indi na nila pag-ipresentar ang Article III nga nagaunod sang mga alegasyon sang bribery, graft kag corruption, culpable violation of the Constitution kag betrayal of public trust may kaangtanan sa ginaalegar nga paghatag sang kwarta sa pila ka mga opisyal sang Department of Education sang si Duterte pa ang secretary sang ahensya halin 2020 tubtob 2024.
Suno kay Castro, bastante na ang mga ebidensya nga ginpresentar sa tatlo ka mga articles kag katuyuan sang pag-drop sang bribery article nga mapadasig ang impeachment trial.
Nagalaum man ang natungdan nga indi maglab-ot sa bulan sang Disyembre ang trial kag magahimo sila sang desisyon angut diri.
