Indi na makabig nga “isolated case” ang pagpangluthang nga natabo sa sulod sang isa ka pribado nga buluthuan sa Zamboanga City.
Sa interview sang Bombo Radyo kay France Castro, former ACT Teachers Partylist Representative, iya ginpahayag nga bilang isa ka manunudlo, nakabatyag ini sang kasubo nga ang mga eskwelahan sa subong ang indi na safe bangud sa mga insidente nga kaangay sini.
Suno kay Castro, kinahanglan nga mas hugtan ang seguridad sa mga buluthuan, pampubliko man ukon pribado, agud masiguro ang kaluwasan sang mga estudyante, manunudlo kag iban pa nga personnel.
Ginpanindugan pa sini nga indi na dapat kabigon nga simple lang nga insidente ang pagpangluthang kag dapat may manabat sa insidente.
Dugang pa sang natungdan, indi lang dapat hatagan sang atensyon kon sin-o ang yara sa likod sang pagpangluthang, kundi dapat nga usisaon sang maayo ang ugat kag rason kon ngaa natabo ang insidente.
