Maga-upod ang Makabayan Bloc sa Trillion Peso March ukon White Ribbon Movement subong nga adlaw bilang pagpanawagan sa transparency, accountability kag pag-untat sang kurapsyon sa gobyerno.
Sa interview sang Bombo Radyo kay former ACT Teachers Party-list Representative France Castro, iya ginpahayag nga ang nasambit nga tikang ang gindihon agud mapalab-ot sa publiko ang panawagan para sa maayo nga panggobyerno kag responsable nga paggamit sang pondo sang pumuluyo.
Suno kay Castro, ang aktibidad pagapangunahan sang nagkalain-lain nga religious kag non-religious groups, kaupod ang nagkalain-lain man nga organisasyon sang mga kabataan nga nagasuporta sa nasambit nga adbokasiya.
Antes ang mobilization, magapatigayon anay sang isa ka misa, antes magmartsa ang mga partisipante padulong sa People Power Monument, sa diin ipatigayon ang programa kag mga pahayag sang nagkalain-lain nga mga grupo.
Nagalaum ang natungdan nga pinaagi sa Trillion Peso March, mas mapabaskog ang tingog sang publiko kag mas mapabatyag ang ila panawagan para sa ikaayo sang pungsod.
