Nagapanawagan ang Makabayan bloc nga i-release na ang medical allowance sang mga health workers nga nagatrabaho sa mga government-owned and controlled corporation (GOCC) specialty hospitals sa Pilipinas.
Sa interview sang Bombo Radyo kay Kabataan Partylist Rep. Renee Co, iya ginpahayag nga nag-file sila sang House Resolution No. 866 agud imbestigahan ang delay nga medical allowance sang mga health workers sa government-owned and controlled corporation (GOCC) specialty hospitals.
Tinutuyo sang resolusyon nga hibaluon kun ngaa wala pa nakabaton ang mga health workers sang benepisyo nga ginahatag sang gobyerno.
Suno kay Co, dugay na nga ginareklamo sang mga health workers ang wala pa nila nabaton nga benepisyo, ilabi na ang mga nagaubra sa government-owned and controlled corporation specialty hospitals.
Isa sa ginatudlo nga rason amo ang pahayag sang Department of Budget and Management nga ang pila ka health workers sa GOCC hospitals mahimo indi sakup sang allowance bangud may libre na sila nga medical treatment sa idalom sang Magna Carta of Public Health Workers. Apang ginpahayag sang Makabayan bloc nga indi ini dapat gamiton nga rason agud indi mahatag ang allowance.
Pahayag pa niya, padayon ang ila pagpakig-angot sa Department of Health agud maathagan ang nasambit nga isyu.
