Ginpanindugan sang Makabayan bloc nga dapat magsungka sa otoridad si Senador Ronald “Bato” Dela Rosa agud atubangon ang mga alegasyon batuk sa iya.
Sa interview sang Bombo Radyo kay France Castro, former ACT Teachers Party-list Representative, iya ginpahayag nga sandig sa international human rights law, importante nga sundon ang nagakaigo nga proseso sang kasuguan kag hustisya.
Suno kay Castro, bilang isa ka mataas nga opisyal sang gobyerno, dapat mangin maayo nga ehemplo sa publiko si Dela Rosa pinaagi sa pagsunod sa kasuguan sa baylo nga magpanago sa otoridad.
Madumduman nga nagapangatubang si Dela Rosa sang arrest warrant nga ginpaguwa sang International Criminal Court may kaangtanan sa ginaalegar kahilabtanan sini sa mga crimes against humanity nga may kaangtanan sa kampanya batok sa iligal nga droga sa panahon sang administrasyon ni anay Presidente Rodrigo Duterte.
Samtang, nagpanawagan ang grupo nga matawhay ang pagpatigayon sang pagdakop kay Dela Rosa agud malikawan nga maapektuhan sang sibilyan ang nasambit nga sitwasyon.
