Nagapati ang Makabayan bloc nga daku ang nabulig sang mga pahayag sang mga amici curiae sa Senate Impeachment Court sa paghimo sang nagakaigo nga desisyon sa isyu sang voting threshold sa impeachment trial ni Vice President Sara Duterte.
Sa interview sang Bombo Radyo kay former ACT Teachers Party-list Representative France Castro, iya ginpahayag nga importante ang panan-awan sang mga gin-imbitar nga legal experts bangud makabulig ini sa mga senator-judges nga mahangpan ang husto nga interpretasyon sang Konstitusyon angut sa numero sang boto nga kinahanglan sa isa ka impeachment case.
Suno kay Castro, dapat tun-an sang maayo sang Senate Impeachment Court ang mga argumento kag legal nga basehan nga ginpresentar sang amici curiae antes maghimo sang pinal nga desisyon.
Dugang pa sang natungdan, importante nga maathag ang mangin desisyon sang mga senator-judges agud malikawan ang anuman nga pangduha-duha sa proseso sang impeachment trial.
