Nagapati ang Makabayan bloc nga posible makapabug-at sa alegasyon sang ginaalegar misused sang confidential funds ni Vice President Sara Duterte ang pag-atubang sang mga personnel sang Philippine Statistics Authority (PSA) sa impeachment trial.
Sa interview sang Bombo Radyo kay France Castro, former ACT Teachers Party-list representative, iya ginpahayag nga posible makahatag sang importante nga impormasyon ang mga PSA official, ilabi na sa pagkumpirma sang identity sang mga indibidwal nga yara ang ngalan sa mga acknowledgment receipt nga ginpresentar bilang dokumento sa kaso.
Suno kay Castro, dapat nga magtutok ang impeachment court sa mga acknowledgment receipt bilang kabahin sang mga dokumento nga may kaangtanan sa paggamit kag liquidation sang confidential funds.
Nagalaum man ang natungdan nga mapadasig pa ang pagtalakay sang kaso bangud may mga nauna nga pagkadelay sa hearing, lakip na ang pagkansela sang session bangud sa malain nga panahon.
