ROXAS CITY – Wala pa gid sa karon ‘naga-sink in’ sa paminsaron sang Top 7 sa October 2022 Licensure Examination for Fisheries Professionals, ang iya pagkapasar kag pag-top sa nasambit nga pasinawan.
Sa interview sang Bombo Radyo kay Mr. Robert Christian Patani, tumandok sang Panay, Capiz apang nag-eskwela sa University of the Philippines-Visayas, Iloilo City, suno diri nga wala gid sini gin-ekspektar nga makapasar siya, ilabi na ang malakip sa Top10.
Pagpakigbahin ni Patani nga sa adlaw sang ila board exam, 30 lang gid ka items ang iya masarangan nga sabtan, bangud sini, nagpangayo siya sang giya sa Ginoo, nagpahuway sa sulod sang lima ka minutos kag nagpangamuyo, kag gintugyan na ang masunod nga hitabo sa Makaako.
Gani, bisan makapasar lang kuntani ang iya pangamuyo, Top 7 ang ginhatag sa iya.
Apisar nga ang handom sini kuntani nga kurso amu ang Accountancy, apang natigayon man sini nga mabaton kag napalangga ang Fisheries, bangud nareyalisar sini ang ka-importansya sang mangin trabaho, nga amu ang nagahatag sang pagkaon sa aton mga lamesa.
Ginpasalamatan man sini ang iya ginikanan, himata kag mga abyan sa kabakod kag inspirasyon, plano man sini nga mangita sang trabaho agud makabulig sa iya pamilya.
Mensahe sini sa mga wala nangin mapalaron, nga may plano ang tanan nga nagakahinabo sa tawo, ang importante nga indi madulaan sang pagsalig kag pagtimakas.
