Isa ka lalaki sa Heilongjiang Province sang China ang nakibot sang matukiban nga ang gintunaan sang makatilingala nga gahod kag pagkaguba sang iya salakyan amo ang 18 kilos sang hazelnuts nga na-jam sa makina kag iban pa nga parte sini.
Suno kay G. Wang, madugay na siya nga nakabati sang nagahuni nga gahod gikan sa idalom sang hood sang iya salakyan apang wala niya ini ginsapak.
Nagdesisyon lang ini nga ipa-check sa mekaniko sang Nobyembre 20 sang lubos nga naguba ang heating system sang salakyan.
Nakibot ang mekaniko sang makita ang isa ka hakop nga hazelnut sa makina sang salakyan. May ara man sa idalom sang windshield, hood, air vents, kag bisan sa cabin filter.
Naglawig sang kapin sa duha ka oras ang pagkuha sang tanan nga hazelnuts. Naglab-ot naman sa 18 ka kilo sang hazelnuts ang nakit-an sa salakyan.
Nagduda si Wang nga mga ilaga ang responsable bangud ang iya salakyan naka-park sa garahe sa diin natago ang isa ka sako sang hazelnuts.
Natukiban niya nga gintago na sang mga ilaga ang katunga sang sako sa sulod sang iya SUV.
