Ginarespeto sang Palasyo sang Malacañang ang kahilwayan sang Independent Commission for Infrastructure (ICI) kasunod sang pag-anunsyo ni Baguio City Mayor Benjamin Magalong sa iya desisyon nga mag-resign bilang special adviser sang komisyon nga naga-imbestigar sang mga anomaliya sa mga proyekto sa imprastraktura sa tunga sang suspetsa nga may yara sang posible conflict of interest.
Suno kay Presidential Communications Office (PCO) Acting Secretary Dave Gomez nga makaluluoy ang pagbiya sang alkalde, apang suno sa iya, nagapangibabaw ang demanda sang pumuluyong Pilipino sa kay sin-o man.
Dugang pa sang opisyal, nga ang ICI nga ginabug-usan sang mga kilala nga propesyonal nga may indi mapanghiwala nga integridad, gilayon nga nagsugod sang ila trabaho sa una nga adlaw nga wala nagauyang sang bisan ano nga tion.
Una nga ginklaro ni Mayor Magalong nga wala sang conflict of interest sa iya trabaho bilang local official kag special adviser sang ICI.
Ginpahayag man sang alkalde nga indi mahapos ang iya desisyon, bisan pa nga nagapati ini nga kinahanglanon ini.
Sa pihak sang iya pagbiya sa komisyon, nagapabilin suno sa iya nga wala nagabag-o ang iya commitment sa kamatuoran kag hustisya kag ginpasalig sini sa publiko nga padayunon niya ang pagpakigbato sa korapsyon.
