Ginhangkat sang Malacañang si Baguio City Mayor Benjamin Magalong nga ipresentar kay Presidente Ferdinand Marcos Jr ang iya ihibalo sa anomaliya sang flood control projects nga naga-involve sang pila ka mga kongresista kag senador.
Bangud kaangay nga madamo sang nahibaluan si Mayor Magalong sa nasambit nga kontrobersiya gani mas maayo nga buligan niya ang gobyerno sa imbestigasyon.
Suno kay Palace Press Officer USec. Claire Castro, dapat pangalanan ni Mayor Magalong ang mga kongresista, senador nga mga kontraktor agud gilayon nga mapasakaan sang kaso ilabi na kun bastante ang ebidensya.
Nakita sang Malacañang nga indi kinahanglan nga mag-appoint sang probe team nga magapanguna sa imbestigasyon sa mga iregularidad sa flood control projects.
Suno kay Castro, may yara na sang ginplastar nga mekanismo kag sistema ang Presidente kon paano patigayunon ang imbestigasyon samtang may preliminary directive man ang Presidente sa regional project monitoring committee.
Sa pihak nga bahin, indi pabor ang House majority leader nga si Sandro Marcos nga magpanguna ang Kamara sa pag-imbestigar sang mga kaupod nga mamalidha nga involved sa mga anomaliya nga flood control projects.
