Ginklaro sang Malacañang Palace nga wala gid sila nagpanginwala sang anuman nga sahi sang bulig sa mga sektor nga nagakinahanglan base sa nagaluntad nga mga kasuguan.
Ini ang pahayag ni Communications Usec Claire Castro matapos nga nadismaya ang pila ka mga transport groups bangud ginkanselar sang gobyerno ang fuel subsidy.
Una na nga ginpahayag ni Presidente Ferdinand Marcos Jr nga wala na sang rason nga padayunon ang subsidy bangud may yara sang pagnubo sang presyo sang petrolyo sa World Market.
Gin-athag ni Castro nga indi malikawan ang ini nga sitwasyon kun sa diin indi gilayon makahimo sang desisyon ang Presidente.
Ginsiling sini nga nagadepende sa gihapon ini sa mga hitabo kag sitwasyon sa karon nga tion.
Sa pihak sini, ginpasalig sang opisyal nga ginatutukan nila ang mga hitabo sa Middle East, partikular sa Iran kag Israel.
Ginpahayag ni Castro nga nahibaluan sang presidente ang tanan nga prayoridad sang iya administrasyon para sa kaayuhan sang mga driver sang pampubliko nga transportasyon.
Padayon suno sa iya ang pangulo nga nagahimo sang importante nga tikang agud mahatagan sang kinahanglanon nga suporta.
