Nagpanawagan ang Malacañang sang mas maid-id kag responsable nga pagreport nahanungod sa mga insidente sang pagpangluthang sa eskwelahan, ilabi na nga ang mga menor de edad ang involved.
Suno kay Palace Press Officer Undersecretary Claire Castro, dapat likawan ang pagbuyagyag sang mga detalye nga posible makatuga sang copycat acts.
Ginhatagan man pagtamod ni Castro ang importansya sang pagtudlo sa mga pamatan-on sang nagakaigo nga pamatasan, pagtahod sa isigkatawo, kag kon paano makig-angot sang nagakaigo sa mga classmates kag mga manunudlo.
Kasunod ini sang magkatuhay nga insidente sang pagpangluthang sa isa ka eskwelahan sa Tacloban kag sa Ateneo de Zamboanga.
Ang Palasyo naghingyo sa media nga amligan ang dignidad, kaluwasan, kag privacy sang mga menor de edad nga involved, subong man ang kaayuhan sang mga pamilya nga namatyan kag ang integridad sang nagapadayon nga mga imbestigasyon sa mga insidente.
Ginpabaskog man sang Department of Education (DepEd) ang seguridad sa mga buluthuan kasunod sang insidente sa Tacloban kag Zamboanga.
