MANILA, Philippines – Nagdeklara sang special non-working days ang Malacañang sa lima ka lokalidad sa pungsod para sa selebrasyon sang ila tagsa ka anibersaryo kag espesyal nga okasyon.
Sa idalom sang Proclamation No. 1260, gindeklara ni Ferdinand Marcos Jr., ang Hunyo 6 bilang special non-working day sa Bamban, Tarlac para sa pagsaulog sang Bamban Day.
Suno sa ginpirmahan ni Pres. Marcos Jr., ang Proclamation No. 1261 nga nagadeklara sang Hunyo 16 bilang special non-working day sa City of Bogo, Cebu bilang kabahin sang selebrasyon sang charter anniversary sang syudad.
Samtang, sa idalom sang Proclamation Nos. 1262 kag 1263, gindeklara ang Hunyo 17 bilang special non-working day sa Quirino, Isabela, kag Maco, Davao de OroQuirino, nga pareho nga magasaulog sang ila ika-59 nga founding anniversary.
Sa pihak nga bahin, pinaagi sa Proclamation No. 1259, gindeklara man ang Hunyo 23 bilang special non-working day sa Tabuk, Kalinga para sa founding anniversary.
Dugang pa sa impormasyon sang Malacañang, ang mga deklarasyon ginpatuman agud mahatagan sang bug-os nga kahigayunan ang mga residente sang nasambit nga mga lugar nga makigbahin kag mag-enjoy sa ila mga selebrasyon.
Nahibaluan nga ang tanan nga proklamasyon ginpirmahan ni Executive Secretary Ralph Recto sa ngalan ni Pres. Marcos Jr., sang Mayo 21, luwas sa Proclamation No. 1259 nga ginpirmahan sang Mayo 19.
Sa padayon man nga pagpakig angotn base sa lagda sang Department of Labor and Employment “DOLE”, ipatuman ang “no work, no pay” sa mga empleyado nga indi magatrabaho sa special non-working days, luwas kon may mas maayo nga polisiya ukon kasugtanan ang kompanya.
Apang para sa mga empleyado nga magatrabaho sa amo nga mga adlaw, makabaton sila sang 130 porsyento sang ila adlaw nga sweldo para sa una nga walo ka oras sang trabaho, kag kon matabo man nga rest day nila ang amo nga adlaw, magasaka ang ila bayad sa 150 porsyento sang ila adlaw nga sweldo.
