Wala naman sang nakita nga krisis sa konstitusyon ang Malacañang sa pihak sang nagapadayon nga kinagamo sa pamunuan sang Senado.
Ini ang ginpahayag ni Palace Press Officer Claire Castro matapos ginpamangkot kon bala ang pag-inaway sa liderato sang senado, ilabi na sa isyu sang special session kag impeachment trial, posible nga magtuga sa isa ka krisis sa konstitusyon.
Suno kay Castro, maathag sa ehekutibo nga ginakilala sini si Acting Senate President Win Gatchalian bilang lider sang Senado.
Ginpahayag man sang opisyal nga ang anuman nga posible nga problema sa implementasyon sang tikang sang senado ang bagay para sa Senado lang kag indi na lakip sa ehekutibo.
Gindugang pa sini nga dapat wala na sang pag-ilinaway angut sa pamunuan sang Senado kag dapat batunon na lang sang pihak nga bahin ang pagkilala sang subong nga pamunuan.
Kasunod ini sang nagapadayon nga pagbinaisay sa magtimbang nga kampo kon sin-o ang lehitimo nga lider sang Senado kag kon sin-o ang dapat magpamuno sa opisyal nga hilikuton sang upper house.
Samtang, luyag naman ni President Ferdinand Marcos Jr. nga mag-ugyon ang mga senador kag masolusyunan ang ila pagbahin-bahin antes magpatigayon sang anuman nga pormal nga pagsinapol ukon intervention ang Executive Branch.
Suno kay Castro, indi mangin epektibo ang plano sang Presidente nga magpatawag sang special session kun padayon lang nga magagamo kag wala nagahugpong ang mga katapo sang Upper House.
Ginhatagan pagtamod sang Palasyo nga dapat mangibabaw ang interes sang publiko kag indi ang personal nga interes sang mga senador sa tunga sang nagapadayon nga away para sa liderato sang Senado.
